Фоторепортаж с фестиваля «Гольшанский замок-2010»

Больш трох тысяч наведвальнікаў Гальшанскага фестывалю ў мінулую суботу акунуліся ў часы сярэдневяковай культуры і рыцарства.

Адразу ў гонар чатырох дат ладзілася свята: 400-годдзя заснавання Гальшанскага замка, 730-годдзя саміх Гальшан, 600-годдзя Грунвальдскай бітвы і 605-годдзя з дня нараджэння Соф’і Гальшанскай – пачынальніцы дынастыі Ягелонаў.

Удзел у гістарычным мерапрыемстве прынялі не толькі прадстаўнікі рыцарскіх клубаў з усёй Беларусі, але і ўдзельнікі тэатралізаванага пралогу. Скажыце, ну дзе яшчэ давядзецца пабачыць столькі розных гістарычных асоб?! Да нашага легендарнага князя Гольшы, Соф’і Гальшанскай, магната Стэфана Сапегі ў госці наведаліся князь Міндоўг, кароль Жыгімонт, князь Святаполк-Мірскі, Барбара Радзівіл і іншыя. Артысты, задзейнічаныя ў тэатралізаваным спектаклі, праілюстравалі культуру, паводзіны, побыт шляхецкіх двароў знакамітых замкаў Беларусі (Мірскага, Навагрудскага, Крэўскага, Гераненскага, Гарадзенскага).

З роляй князя Гольшы паспяхова справіўся Міхаіл Свірскі, ролю Соф’і Гальшанскай бездакорна выканала Наталля Гардзей, а Сяргей Мойсевіч удала перадаў вобраз Стэфана Сапегі.

Свята распачалося балем у Соф’і Гальшанскай, дзе змяшаліся эпохі. І па наваколлі паплыло адчуванне, падобнае на казачнае.

Лірычным настроем, пранікнёнасцю былі прасякнуты вырабы народных майстроў і майстрых “Горада майстроў”. Выкананыя па-майстэрску, яны прыцягвалі ўвагу сваёй самабытнасцю і каларытам.

Самым яркім, запамінальным і цікавым было відовішча рыцарскіх спаборніцтваў. Ім было не да рамантыкі: яны досыць цяжка працавалі, каб даставіць пацеху гледачам. Конны рыцарскі турнір, турніры лучнікаў, апранутыя ў жалезныя даспехі і касцюмы сярэднявечча рыцары дэманстравалі сваё майстэрства ў валоданні мячом, кап’ём, стрэламі.

На працягу дня ўдзельнікі свята, госці, вандроўнікі, турысты мелі магчымасць падсілкавацца ашмянскімі традыцыйнымі прысмакамі: пачаставацца каўбаскай і шашлыкамі, выпіць кавы і гарбаты, пакаштаваць юбілейныя караваі, прадэгуставаць прадукцыю мясцовых прадпрыемстваў.

Напрыканцы дня гледачы акружылі сцэнічную пляцоўку, дзе ладзіўся вялікі канцэрт сярэднявечнай музыкі. Музычныя групы “Стары Ольса”, “Літвін Троль” і іншыя музыканты-выканаўцы заваражылі прысутных сваім выканальніцкім майстэрствам і талентам, дапамаглі напоўніць свята эмацыянальнасцю, рамантызмам і непаўторнасцю.

Кульмінацыяй фестывалю “Гальшанскі замак” стала вогненнае шоу, падчас якога акцёры спецыялізаванага тэатра прадэманстравалі свае акрабатычныя нумары з запаленымі факеламі.

Не кожнае свята і не ўсюды завяршаецца так прыгожа і ярка. А ў Гальшанах яго будуць чакаць і ў наступным годзе, з яшчэ больш насычанай і разнастайнай праграмай, цікавымі ідэямі і задумамі, яркім і запамінальным гістарычным і сучасным шоу. Менавіта такую думку выказалі асноўныя арганізатары фестывалю: кіраўнік турыстычнага агенцтва “ГісторыяТур” Алесь Кушнер і старшыня Ашмянскага райвыканкама Юрый Адамчык падчас прэс-канферэнцыі для журналістаў.

Ганна Давідовіч.

Фота Святланы МУЦЯНСКАЙ.

Больш фотаздымкаў глядзіце тут