Алея гістарычнай памяці ў дзень правядзення рэспубліканскага суботніка з’явілася ў Барунах. Настаўнікі і вучні мясцовай установы адукацыі прысвяцілі пасадку дрэўцаў трагічнай старонцы ў гісторыі нашай краіны: спаленым фашыстамі на тэрыторыі Беларусі ў гады Вялікай Айчыннай вайны вёскам.
Удзел у патрыятычнай акцыі прынялі члены моладзевай арганізацыі БРСМ, піянеры, валанцёры грамадскага таварыства Чырвонага Крыжа.
Добраахвотнаму працоўнаму пачыну папярэднічалі інфармацыйныя гадзіны, праведзеныя ў кожным класе, на якіх са школьнікамі была абмеркавана тэма генацыду беларускага народа ў гады Вялікай Айчыннай вайны. Спаленая беларуская вёска Хатынь, знішчаны населеныя пункты ў нашым раёне – прыклады зверстваў карнікаў, якія абавязаны памятаць усе пакаленні беларусаў.
Аліна БЕЛІЦКАЯ.