Зімовыя канікулы — доўгачаканы час адпачынку і забаў, які прыходзіцца на самую халодную і казачную пару года! Школьнікі з нецярпеннем чакаюць гэты час, каб атрымаць асалоду ад зімовых забаў, адпачыць ад вучобы і нацешыцца зносінамі з сябрамі і сям’ёй.
Мой адпачынак пачаўся крыху раней, чым наступілі канікулы… У мяне з’явілася магчымасць пабываць у Нацыянальным дзіцячым цэнтры “Зубраня”! Змена доўжылася сямнаццаць дзён. За два з паловай тыдні мы здружыліся і сталі сапраўднымі сябрамі. Гэта была нялёгкая, але разам з тым цікавая змена. Сумна ўсведамляць, што гэта была мая першая і апошняя паездка ў «Зубраня», але затое якая!
Хочацца сказаць некалькі слоў аб нашым любімым 7-м «Зорным». Такое адчуванне, што наш атрад сабраў самых добрых, самых таленавітых дзяцей. Ніколі не думала, што можна настолькі хутка здружыцца, стаць адным цэлым. Мы заўсёды былі разам. У кожнага з нас можна было чамусьці навучыцца, кожны меў што данесці іншым: мы былі не толькі вучнямі, але і настаўнікамі адзін аднаму.
У віры актыўнай дзейнасці я неяк і не заўважыла, як надышлі Каляды і Новы год! У адно імгненне увесь свет атуліла казачная атмасфера. На вуліцах зазіхацелі агеньчыкі гірляндаў, вітрыны ўпрыгожыліся цацкамі і мноствам бліскучак, а ў хатах неяк адразу стала цяплей і ўтульней.
Новы год і Каляды — гэта час, калі родныя збіраюцца разам, каб атрымаць асалоду ад зносін і падзяліцца незабыўнымі ўспамінамі.
Для нашай сям’і гэтыя святы – адметны час, калі ўсе збіраюцца разам. Наш дом напаўняецца водарам ялінкі і пахам ежы, гучыць смех, чуюцца душэўныя размовы. Бацькі, дзеці, бабулі і дзядулі збіраюцца за адным сталом, каб падзяліць радасць свята, даведацца пра навіны і падарыць адзін аднаму часцінку свайго клопату і ўвагі.
Сёлетнія зімовыя канікулы адрозніваюцца ад ранейшых… У гэтым годзе я пражывала іх неяк больш па-даросламу. Мне было сумна, што гэта былі мае апошнія дзіцячыя Каляды і Новы год. У глыбіні душы мне хочацца адматаць жыццё на гадоў пяць назад і атрымаць асалоду ад гэтага адрэзку жыцця спаўна!
А разам з тым хочацца пажадаць усім ашмянцам здароўя, шчаслівых усмешак. Будзьце сабой, не заганяйце сябе ў рамкі! Будзьце адважнымі! Не бойцеся паказацца не такімі, як усе! Нясіце ў сваёй душы дабрыню і спагаду!
Іаланта АЎСЯНІК, слухач школы маладога журналіста пры рэдакцыі раённай газеты.