Бягучы год для нашай краіны знакавы: сёлета мы адзначаем 70-ю гадавіну са дня вызвалення Беларусі ад нямецка-фашысцкіх захопнікаў. Да юбілейнай даты ў раёне прымеркаваны шэраг мерапрыемстваў, у якіх задзейнічаны органы мясцовай улады, вучнёўскія і працоўныя калектывы, грамадскія аб’яднанні і арганізацыі.
Раённы савет ветэранаў сумесна з установамі адукацыі арганізаваў алімпіяду “Мы ведаем, помнім”. У абласным этапе конкурснай праграмы прыме ўдзел работа краязнаўчай секцыі навуковага таварыства “Эрудыт” СШ №2.
Апошнія рэпетыцыі перад абласным этапам рэспубліканскага фестывалю “Не старэюць душой ветэраны” праводзіць народны хор ветэранаў вайны і працы РДК. Ужо на наступным тыдні калектыў пад кіраўніцтвам Уладзіміра Карасёва адправіцца на творчы конкурс у Іўе.
Спартыўнае мерапрыемства з рабочай моладдзю, прымеркаванае да юбілейнай даты, плануе правесці раённы камітэт БРСМ. Актывісты маладзёжнай арганізацыі- вучні школ раёна рэгулярна наведваюць ветэранаў, якія пражываюць у зоне размяшчэння навучальнай установы. Да ганаровай даты будзе прымеркавана ўрачыстае прыняцце ў рады БРСМ і ўручэнне білетаў новым членам арганізацыі.
У бібліятэках раёна арганізаваны тэматычныя кніжныя выставы. Рознапланавыя творчыя мерапрыемствы рыхтуюць да 70-годдзя з дня вызвалення Беларусі клубныя ўстановы. На працягу года вучні школ раёна прымаюць удзел у патрыятычных акцыях “Дзякуй за жыццё”, “Напішы пісьмо ветэрану”, “Ветэран жыве побач”, “Пажылым – ад моладзі”.
Аліна БЕЛІЦКАЯ.
