Доўгачаканая сустрэча адбываецца пад дэвізам «З мінулага ў дзень сённяшні”.
Пачалося мерапрыемства канцэртам арганнай музыкі, які сабраў гасцей і мясцовых жыхароў у сценах касцёла святога Іаана Хрысціцеля. Творы Баха, Гуно, Агінскага, Гендэля выканалі саліст Беларускай дзяржаўнай філармоніі, лаўрэат міжнародных музычных конкурсаў Аляксандр Музыкантаў і знакаміты арганіст з г. Маладзечна Андрэй Міхневіч.
Затым па традыцыі адбылося тэатралізаванае шэсце з цэнтра аграгарадка да таямнічай “каменнай кветкі” Гальшанскага краю. У ім прынялі ўдзел фантастычныя насельнікі замка, вершнікі і сярэднявечныя рыцары клубаў гістарычных рэканструкцый.
Пасля ўрачыстага адкрыцця фестывалю сваё майстэрства прадэманстравалі клубы гістарычнай рэканструкцыі «Клан МакВітан» і «Веруш», а таксама гурт Nevrida.
У праграме свята шмат цікавостак, сярод якіх выступленне коннага клуба «Секерж», а таксама канцэртная праграма ўдзельнікаў шоу «Х-фактар Беларусь» і вогненна-піратэхнічнае шоу «Магія агню”.
Фота Аліны БЕЛІЦКАЙ.