На мінулым тыдні Ашмянскі раён наведала дэлегацыя Вільнюскага і Шальчынінскага раённых самакіраванняў на чале з мэрамі гэтых адміністрацыйных адзінак — Марыяй Рэкст і Здзіславам Палевічам. На пачатку сустрэчы ў зале пасяджэнняў госці абмяняліся думкамі, былі акрэслены накірункі далейшай сумеснай дзейнасці, якая будзе праяўляцца як у культурных, так і адукацыйных зносінах, асваенні інвестыцыйных праектаў, абмене маладзёжнымі дэлегацыямі, сумесным правядзенні спартыўных мерапрыемстваў.
Паміж Ашмянскім раённым выканаўчым камітэтам і Шальчынінскім раённым самакіраваннем быў падпісаны пратакол намераў аб заключэнні пагаднення аб супрацоўніцтве. Трэба зазначыць, што пагадненне з Беларускім культурным цэнтрам Шальчынінскага раёна аб супрацоўніцтве ў галіне адукацыі, культуры, спорту і турызму наш раён падпісаў яшчэ тры гады таму і кіраўнік гэтага цэнтра Мікалай Амялевіч з’яўляецца частым госцем на Ашмяншчыне. Старшыня райвыканкама Юрый Адамчык выказаў меркаванне, што дружба паміж раёнамі будзе ўмацоўвацца і садзейнічаць іх далейшаму развіццю.
Старасты старостваў (накшталт нашых старшыняў сельвыканкамаў) былі зацікаўлены на ўласныя вочы пабачыць, як арганізуюць мясцовыя органы ўлады работу з насельніцтвам, як рашаюцца на тэрыторыі сельскіх Саветаў пытанні медыцынскага абслугоўвання, адукацыі і культуры, сацыяльнага забеспячэння асобных катэгорый грамадзян, як развіваецца ў нашым раёне аграрны сектар і эканоміка, жыллёва-будаўнічая галіна. У праграму наведвання былі ўключаны Жупранская СШ, аддзяленне кругласутачнага знаходжання для састарэлых грамадзян у Жупранах, Барунскі УПК, мясцовая амбулаторыя, касцёл Святых Пятра і Паўла. У Гальшанах госці пабывалі ў дзіцячым садку, народным музеі імя Эдуарда Корзуна ў гімназіі, Доме культуры і сельвыканкаме.
Аліна БЕЛІЦКАЯ.
Фота Святланы МУЦЯНСКАЙ.