На цэнтральнай вуліцы горада Ашмяны вы маеце магчымасць імгненна перанесціся ў XVІ стагоддзе.
На сцяне будынка вы ўбачыце, як са старадаўняй карэты выходзіць герой гэтага сучаснага жывапіснага роспісу — Мікалай Радзівіл па мянушцы Руды.
Ці так выглядаў яго прыезд у Ашмяны, ці не — няхай спрачаюцца гісторыкі. Даўно гэта было. Звестак амаль не засталося. Таму сам факт прыезду сюды вядомага дзяржаўнага і вайсковага дзеяча даўно агарнулі маляўнічыя легенды.
Але побач з легендамі заўжды ёсць месца простым жыццёвым высновам.
Радзівіл прыехаў у Ашмяны.
Гэй, народзе, князя сустракай!
Загулі званы у знак пашаны,
Грамада паднесла каравай…
Завітаў па справах ці у госці?
Невядома. Але чуткі ёсць:
Радзівіл быў «знаўцам» прыгажосці,
Да дзяўчыны ехаў ягамосць.
Што за цуд — ашмянскія дзяўчаты!
Хто іх стрэне — прыпыняе крок.
Прыгажунь і сёння тут багата —
Едуць хлопцы зблізку і здалёк.
Не ў карэце, як той князь высокі, —
Маладзён на ровары імкне!
Час заменіць транспартныя сродкі.
Прыгажосць ніколі не міне.
Яўген ПЯСЕЦКІ
Па матэрыялах газеты «Звязда»