У Дзень абаронцаў Айчыны ў Кальчунскай СШ прайшло спартыўнае свята. Яно было незвычайным, бо ўдзельнічалі ў ім акрамя нашых школьнікаў вучні і настаўнікі Граўжышкоўскага ВПК і рэп-гурт з Ашмян Black Street.
Пачалося мерапрыемства ў спартыўнай зале, дзе была арганізавана спартакіяда. У ёй спаборнічалі дзве каманды: Кальчунскай СШ і Граўжышкоўскага ВПК. У перапынках паміж заданнямі яскравымі нумарамі мастацкай самадзейнасці радавалі ўдзельнікаў свята таленавітыя вучні нашай школы. На жаль, ці на шчасце, але пераможцаў у спартакіядзе не было. Перамагла дружба: абедзве каманды прыйшлі да фінішу з аднолькавай колькасцю балаў.
Пасля ўсе ўдзельнікі перайшлі ў актавую залу. Тут адбыўся сумесны канцэрт вучняў і настаўнікаў абедзвюх школ. Мілагучныя песні, заліхвацкія танцы – усё гэта можна было назіраць падчас канцэртнай праграмы.
Яшчэ некалькі музычных нумароў нам падарылі госці з Ашмян – хлопцы з рэп-гурта Black Street. Рэп прагучаў вельмі пранікнёна і энергічна. Дырэктар нашай школы Антон Пятровіч Шмукста ўручыў калектыву падзячны ліст.
Свята спадабалася ўсім. Яно не толькі здружыла нашы школы, але і выявіла новыя таленты.
Інга Гіз, слухач школы маладога журналіста, вучаніца Кальчунскай СШ.
Фота: http://www.kolchuny.by/
