Прыемна, калі вынікі тваёй працы атрымліваюць высокую ацэнку. Удвая прыемней, калі на іх звяртаюць ўвагу не толькі сябры, калегі, знаёмыя, а, мажліва, і незнаёмыя людзі, але і калі яны выклікаюць шчырую зацікаўленасць за мяжой. Днямі добрая навіна прыйшла ў СШ №3 з нямецкага горада Мюнстэра, дзе прайшоў трэці па ліку Міжнародны конкурс-выстава выяўленчага мастацтва і дэкаратыўна-прыкладной творчасці. У конкурсе прынялі ўдзел вучні СШ №3, выхаванцы студыі пад кіраўніцтвам Леанарды Станіславаўны Казіміравай. У Мюнстэр былі адасланы работа з саломкі Марыі Канановіч пад назвай “Ліліі”, жывапіс на таніраванай паперы “Мой дружок” Паліны Камінскай і роспіс на тканіне “Юная скрыпачка” Арцёма Усціновіча.
Усе тры работы ашмянскіх вучняў атрымалі высокую ацэнку і былі ўдастоены першых месцаў. У якасці ўзнагароды юныя таленты Ашмяншчыны разам са сваім настаўнікам атрымалі запрашэнне ў Германію на навучальную праграму для дзяцей і дарослых, якая будзе ўключаць майстар-класы, абмен вопытам і знаёмства з нямецкай культурай і традыцыямі.
Аліна САНЮК