На мінулым тыдні ўпраўленне і ўстановы адукацыі раёна падвялі вынікі работы за мінулы год і вызначыліся з задачамі на чарговы каляндарны перыяд. У рабоце выніковага савета ўпраўлення адукацыі прынялі ўдзел намеснік старшыні райвыканкама Наталля Станкевіч і старшыня райкама прафсаюза работнікаў адукацыі і навукі Мікалай Кунцэвіч.
Раённы вучэбна-метадычны кабінет сумесна с установамі адукацыі зладзіў выставы метадычных напрацовак, вырабаў дэкаратыўна-прыкладной творчасці вучняў і настаўнікаў, даследаванняў школьнікаў раёна ў межах рэспубліканскага конкурсу “100 ідэй для Беларусі”.
— Асноўныя намаганні ўпраўлення і ўстаноў адукацыі раёна былі накіраваны на павышэнне якасці адукацыі, максімальную занятасць няпоўнагадовых, аптымізацыю расходаў у галіне і ўмацаванне матэрыяльна-тэхнічнай базы, рэалізацыю мерапрыемстваў Года малой радзімы, — адзначыла ў сваім выступленні начальнік упраўлення Святлана Баркоўская. – Сёлета ўпраўленне адукацыі раёна атрымала дыплом другой ступені ў абласным конкурсе на лепшую арганізацыю работы структурных падраздзяленняў раённых выканаўчых камітэтаў.
Аналізуючы работу сістэмы адукацыі, Святлана Мікалаеўна адзначыла, што назіраецца значная дынаміка ў выкананні важнейшых задач як дашкольнай, так и агульнай сярэдняй адукацыі:
— Сёння ахоп дзяцей дашкольнай адукацыяй складае 100 працэнтаў, адсутнічаюць выпадкі дзіцячага траўматызму пры арганізацыі адукацыйнага працэсу. Добрыя вынікі паказваюць педагагічныя работнікі і выхавальнікі на рэспубліканскіх і міжнародных конкурсах.
У сістэме агульнай сярэдняй адукацыі ў мінулым годзе рэалізаваны два новаўвядзенні: адменены ўступныя іспыты ў гімназіі і арганізавана прафесійная падрыхтоўка для вучняў 10-х класаў. У нашым раёне са 178 дзесяцікласнікаў звыш 40 працэнтаў асвойваюць спецыяльнасці “прадавец”, “слесар” і “швачка”. 101 дзесяцікласнік вывучае прадметы на павышаным узроўні. Працягваюць работу профільныя педагагічныя групы ў СШ № 2 СШ № 3. Адкрыты профільны клас аграрнай накіраванасці на базе Гальшанскай СШ.
У раёне забяспечаны 100-працэнтны ахоп дзяцей, якія маюць патрэбу ў карэкцыйна-педагагічнай дапамозе і спецыяльнай адукацыі, сфарміравана сістэма ранняй комплекснай дапамогі, аптымізавана сетка класаў інтэграванага навучання і выхавання.
Цэнтр карэкцыйна-развіваючага навучання і рэабілітацыі Ашмянскага раёна па выніках працы быў прызнаны лепшым у вобласці сярод устаноў спецыяльнай адукацыі ў конкурсе «Лепшая ўстанова спецыяльнай адукацыi».
На савеце былі падведзены вынікі раённага штогадовага конкурсу на лепшую ўстанову адукацыі раёна. Жаданыя блакітныя шыльды па выніках года атрымалі сярэдняя школа №3 (дырэктар Уладзімір Войнюш), Жупранская СШ (дырэктар Кацярына Астрамовіч), Дакурнішскі вучэбна-педагагічны комплекс (Людміла Кардзіс), яслі-сад №7 (загадчык Алена Гудас) і яслі-сад агр. Кракоўка (загадчык Святлана Яблонская).
— Бягучы год у чарговы раз праходзіць пад знакам Года малой радзімы, -падкрэсліла Святлана Баркоўская. — Ён павінен стаць знакавым для нас па добраўпарадкаванні тэрыторыі і арганізацыі работы па навядзенні парадку на зямлі. Мы павінны займацца развіццём вучэбных кабінетаў, рэкрыацый для таго, каб кожны клас, кожная ўстанова мелі свой твар.
Аліна САНЮК.
Фота Святланы МУЦЯНСКАЙ.