Цёплым жнівеньскім днём у аграгарадку Каменны Лог прайшло свята вёскі «Бабровая хатка».
Нягледзячы на тое, што свята пачалося а шаснаццатай гадзіне, тут было шматлюдна — сабраліся сяльчане, дзеці і ўнукі, якія прыехалі на адпачынак, жыхары суседніх вёсачак, пагранічнікі, супрацоўнікі РАНС, дачнікі. Завіталі сюды і вучні Цудзенішскага вучэбна-педагаічнага комплексу — удзельнікі летніка «Юны пагранічнік».
Старшыня сельскага Савета Святлана Жалудкевіч прывітала жыхароў і гасцей мястэчка і падзякавала за тое, што яны сабраліся на каменналогскай зямлі. Госць свята начальнік РАНС Андрэй Горбач пагаварыў з усімі прысутнымі на тэму пажарнай бяспекі, расказаў аб сітуацыі ў раёне, вобласці і рэспубліцы.
Сваёй назве свята абавязана вялікай сям’і баброў, якая жыве непадалёк вёсачкі. Таму нядзіўна, што галоўным героем урачыстасці стаў працавіты і старанны Бабёр Бабровіч (загадчык сельскага клуба Анастасія Віткоўская). Разам з гасцямі ён адправіўся ў цікавае падарожжа «Па слядах бабра», дзе прапанаваў усім жадаючым дапамагчы з будоўляй хаткі.
Дзякуючы працавітасці жыхароў Ашмяшчыны драўляная хатка цягнулася да неба і разрасталася ў бакі на вачах. Мужчыны маглі прыняць удзел у майстар-класе па разьбе з дрэва і азнаёміцца з выставай народных рамёстваў. За сваю стараннасць яны атрымалі ўзнагароду. Вечарам каля яркага вогнішча Бабёр расказаў аб сваіх прыгодах, падзяліўся шматлікімі сакрэтамі, а таксама расказаў легенды і паданні аб сваёй бабровай сям’і.
Шчырымі песнямі, гучнымі танцамі, тэатралізаванымі прадстаўленнямі, тэматычнымі гульнямі — гасцей віталі работнікі сельскіх клубаў аграгарадкоў Каменны Лог і Мураваная Ашмянка, вядомы калектыў «Жытніца».
Самых маленькіх гасцей свята закружылі ў песнях, танцах і гульнях Баба Яга і Кікіміра. Запрасілі да сябе гандлёвыя рады з салодкай ватай і папкорнам, надуўны атракцыён і спартыўная пляцоўка для гульні ў валейбол.
Кацярына РУДЗІК.
Фота Святланы МУЦЯНСКАЙ.