У пятніцу адбылося ўрачыстае адкрыццё абноўленага энергаэфектыўнага ясляў-сада №6. Дзякуючы ўдзелу ў праграме ПРААН «Энергаэфектыўнасць у школах», ва ўстанове праведзена мадэрнізацыя абсталявання і цеплавая рэабілітацыя будынка.
На цырымоніі адкрыцця прысутнічалі старшыня райвыканкама Міраслаў Сарасек, намеснік кіраўніка аперацыйнага аддзела праектаў і праграм Прадстаўніцтва ЕС у Беларусі Аудроне Урбанавічуце, начальнік упраўлення адукацыі Гродзенскага аблвыканкама Аляксандр Сонгін, каардынатар праектаў ПРААН Ігар Чульба, начальнік аддзела навукова-тэхнічнай палітыкі і знешнеэканамічных сувязей Дэпартамента па энергаэфектыўнасці Андрэй Мінянкоў, а таксама каардынатар праектаў ЕС у галіне энергетыкі і абароны навакольнага асяроддзя Алена Ракава.
Пасля афіцыйнай часткі для гасцей была арганізавана экскурсія па абноўленым будынку. Загадчык дашкольнай установы Марына Мельнікава расказала, што энергаспажыванне тут зменшылася ў два разы, дзякуючы ўсталяваным на даху сонечным калектарам. Акрамя таго, ва ўстанове ўсталяваны толькі энергазахавальныя лямпы, утылізатары цеплыні для падагрэву прытокавага паветра, уцеплены сцены і дах, звычайныя вокны заменены на двухкамерныя шклопакеты, мадэрнізаваны басейн і кухоннае абсталяванне.
Праект быў рэалізаваны пры фінансавай падтрымцы Еўрапейскага Саюза, Гродзенскага абласнога выканаўчага камітэта і Ашмянскага раённага выканаўчага камітэта. Яго выканаўцамі выступілі ПРААН у Рэспубліцы Беларусь і Дэпартамент па энергаэфектыўнасці Дзяржстандарту Рэспублікі Беларусь. Кошт праекта склаў каля Br800 тыс. Адзначым, што сад у Ашмянах стаў другой установай у рэгіёне, у сярэдзіне верасня аналагічны энергаэфектыўны дзіцячы сад быў адкрыты ў Гродне.
Важна, што рэалізацыя праекта прадугледжвала не толькі тэхнічныя пераўтварэнні, але і вялікую адукацыйную працу. Дашкольнікі разам з педагогамі вучыліся эканоміць, удзельнічаючы ў шматлікіх «энергаэфектыўных» мерапрыемствах, арганізоўвалі творчыя выставы і экскурсіі на прадпрыемства электрычных сетак. Вось і сёння яны расказалі шматлікім гасцям установы адукацыі аб праекце, разважалі аб энергаэфектыўнасці, спявалі і танцавалі. Усе юныя зорачкі атрымалі ад гасцей падарункі на памяць.
Хутка выхаванцы садка пойдуць у школу, а сюды прыйдуць іншыя дзеці, для якіх другім домам стане цёплы і ўтульны дзіцячы садок.
Кацярына РУДЗІК.
Фота Аляксандра НАУМЧЫКА.
