Сёння вернікі-хрысціяне адзначаюць два вялікія святы. Да католікаў “завітаў” светлы Вялікдзень, упрыгожыўшы святочны стол пафарбаваным яечкам – сімвалам вечнага жыцця, у праваслаўных — Вербніца, або Уваход Гасподні ў Іерусалім.
Вербная нядзелька – адно з самых яркіх і добрых свят. У Беларусі яго галоўнай прыкметай стала сціплая галінка вярбы. Традыцыя “пасцябаць” у гэты дзень адзін аднаго лазовымі пруцікамі прыйшла да нас ад продкаў, якія закладвалі ў яе магічны сэнс – перадаць жыватворнуюсілу расліны людзям і жывёле, а таксама забяспечыць ахову сваёй маёмасці.
Упрыгожаныя галінкі вярбы прынеслі сёння ашмянцы ў царкву, каб асвяціць і захоўваюць дома, як каштоўную рэліквію.
Сёння ўсе думкі і малітвы вернікаў былі скіраваны на тое, каб спыніць вялікую пагрозу, што абрынулася на наш свет. Аб захаванні духоўнай сувязі з Богам, веры і цярпенні, любові да бліжняга свайго заклікаў напрыканцыўрачыстага набажэнства ў храме Уваскрасення Хрыстова протаіерэй Пётр Пятлёха.
Наперадзе ў праваслаўных — сем дзён споведзяў і строгага посту, а ў нядзелю яны прывітаюць адзін аднаго шчырымі словамі “Хрыстос уваскрос! І пачуюць у адказ — “Сапраўды ўваскрос!”.
Аліна САНЮК.
Фота Святланы МУЦЯНСКАЙ.