Якім павінен быць выхавацель дзіцячага садка? На гэта пытанне на працягу раённага конкурсу “Выхавацель года” спрабавалі адказаць не толькі восем канкурсантак, але і іх выхаванцы. Розныя гучалі адказы, жартоўныя і вельмі сур’ёзныя, аднак ніхто не падверг сумневу, што ў выхавацеля павінна быць любячае сэрца, пазітыўныя думкі, крэатыўнае мысленне. А яшчэ, як адказалі дзеці, яму б не перашкодзіла дастойная зарплата.
Выступленні ўдзельніц конкурсу пацвердзілі, што нашы выхавацелі ўсімі гэтымі якасцямі валодаюць. Яны эрудзіраваныя і артыстычныя, цярплівыя і шчырыя, абаяльныя і маладыя, нягледзячы на ўзрост.
Так атрымалася, што побач з педагогамі, якія робяць першыя крокі ў сваёй дзейнасці, выступалі спецыялісты, што аддалі выхаваўчай рабоце амаль тры дзесяткі год, аднак усіх іх аб’ядноўвала любоў да дзяцей і сваёй прафесіі, якая сцірала ўзроставыя межы. Два гады назад прыйшла працаваць у Гальшанскі дзіцячы садок Тамара Вайгяніца. Педагагічнае майстэрства яна спасцігае ад сваіх калег і выхаванцаў. А вось Тэрэза Афонская, выхавацель Навасёлкаўскага НПК, шчыра дзеліцца сваім вопытам з маладымі педагогамі, бо яе працоўны стаж складае больш за 25 год. Багаты багаж як практычных, так і тэарэтычных ведаў накоплены ў Тамары Ляшчэвіч з дзіцячага садка №3, Таццяны Прылуцкай з дзіцячага садка №1, Валянціны Шукеловіч, якая прадстаўляла дашкольны цэнтр развіцця дзіцяці горада, Таццяны Шаверда выхавацеля дзіцячага садка №6, Ліліі Зарубы з Кальчунскага дашкольнага цэнтр развіцця дзіцяці і Валянціны Маліноўскай з дзіцячага садка №4. Шкада, што ў фінальнай частцы не змагла прыняць удзел Вераніка Пашкевіч, якая абараняла гонар Кракоўскага дзіцячага садка. Дастойна выступіўшы ў першым этапе – паказе адкрытых заняткаў, яна па шэрагу прычын не змагла выступіць у фінале.
Перад пачаткам святочнай праграмы выхавацеляў павіншавалі начальнік аддзела адукацыі Наталля Кучынская і галоўны спецыяліст аддзела Жанна Загорская, якія пажадалі канкурсанткам упэўнена крочыць да педагагічнага Алімпу. На гэтым шляху нельга абысціся без дапамогі і прафесійнай падтрымкі педагогаў-калег, на якіх павінны раўняцца маладыя спецыялісты. Яны, дарэчы, таксама падняліся на сцэну, і далі клятву верна служыць абранай прафесіі і сваім выхаванцам, а таксама прадаўжаць багатыя педагагічныя традыцыі Ашмяншчыны.
Седзячы ва ўтульнай глядзельнай зале сярэдняй школы №2, захаплялася кожным выступленнем канкурсантак. Яны, сапраўдныя прафесіяналы педагагічнай працы, знаходзяць час не толькі на работу, але і свае сем’і, а таксама хобі. Яна майстры на ўсе рукі: вяжуць, вышываюць, вырошчваюць кветкі, спяваюць і танцуюць, здзіўляюць кулінарнымі шэдэўрамі і ўражваюць фларыстыкай. У іх вялікае сэрца ўмяшчаецца любоў не толькі да сваіх родных, але і чужых дзяцей, якіх ім давяраюць мамы і таты.
Аб тым, што дзеці адказваюць сваім выхавацелям узаемнасцю, сведчылі выступленні дашкольнікаў. Яны хваляваліся за сваіх “другіх” мам, жадалі ім перамогі і моцна трымалі за руку. У адным з вершаў, які прагучаў са сцэны, дзеці адзначылі, што ім выхавацель ніколі не здрадзіць, што і з’яўляецца самай высокай ацэнкай дзіцячага даверу і любові.
Прыемна было бачыць, як разам з выхавацелямі выступаюць бацькі маленькіх гадаванцаў садкоў раёна, а яшчэ зусім нядаўна яны самі наведвалі гэтыя дашкольныя ўстановы. Час ідзе, а ў садках па-ранейшаму пануюць дабрыня і любоў, шчырыя і цёплыя адносіны да малышоў.
Адзін з конкурсаў уключаў абарону адукацыйных праектаў. Розныя па тэматыцы, яны былі скіраваны на развіццё творчых здольнасцей, фарміраванне даследчых навыкаў і навыкаў бяспечных паводзін, прывіццё любові і павагі да роднага краю і яго традыцый. Пра свае педагагічныя ідэі многія выхавацелі расказалі разам з дзецьмі.
На выдатна справіліся канкурсанткі і з апошнім іспытам – інтэлектуальным конкурсам, які заключаўся ў веданні фразеалагічных зваротаў.
У час падвядзення вынікаў конкурсу, гледачоў і ўдзельнікаў мерапрыемства парадавалі сваёй творчасцю вучні сярэдняй школы №1, якія падрыхтавалі канцэртную праграму.
Ганаровымі граматамі і падарункамі былі ўзнагароджаны ўсе канкурсанткі. Як адзначыла начальнік аддзела адукацыі Наталля Кучынская, на свяце педагагічнага майстэрства не было пераможаных. Усе ўдзельніцы конкурсу – пераможцы. У іх ёсць крылы і жаданне ўзляцець. Таму Наталля Генадзьеўна з задавальненнем павіншавала Тамару Вайгяніца, пераможцу ў намінацыі “Сэрца аддаю дзецям”; Тэрэзу Афонскую, якая была лепшай у намінацыі “Лепшыя традыцыі ў адукацыі”; Лілію Зарубу, пераможцу ў намінацыі “Майстар сваёй справы”; Таццяну Шаверда ( намінацыя “Інтэлект і глыбіня”), Валянціну Шукеловіч ( намінацыя “Прафесіяналізм і майстэрства”), Валянціну Маліноўскую (намінацыя “Прафесіяналізм і творчасць”). Першае месца на конкурсе заняла Тамара Ляшчэвіч. Гран-пры атрымала Таццяна Прылуцкая. Яна была лепшай па выніках усіх конкурсаў. Высокую ацэнку ў журы атрымалі і яе заняткі, праведзеныя ў старшай групе.
Аліна САНЮК.
Фота Святланы МУЦЯНСКАЙ.