Разам з маленькімі сняжынкамі за акном, нібы балерыны, круціліся паэтычныя радкі. Лёгка падалі на плечы прысутных, далучалі іх да цудоўнага свету творчасці, а пасля закруцілі ў вальсе пад чароўныя мелодыі Шапэна. Сапраўды, паэзія робіць душы людзей лёгкімі і чулымі. Сёння ў шалёным свеце нам так часта не хапае месца для чароўнага…
Добрай традыцыяй стаў раённы конкурс чытачоў польскай паэзіі. На мінулым тыдні прыхільнікаў і аматараў польскай мовы, літаратуры і культуры ён сабраў у цэнтры творчасці дзяцей і моладзі. З кожным годам конкурс пашырае свае межы, жадаючых вывучаць польскую мову становіцца больш, бо валоданне замежнай мовай, веданне культуры суседняга народа робіць нас духоўна багатымі і адукаванымі людзьмі.
Сёлета ў конкурсе прынялі ўдзел вучні 4-11 класаў навучальных устаноў Ашмяншчыны — гімназіі №1, СШ №1, СШ №2, СШ №3, школы-інтэрната, Барунскага і Цудзенішскага ВПК.
У гэты цёплы, па-сапраўднаму ўтульны вечар гучалі не толькі класічныя творы, але і сучасныя вершы для дзяцей і моладзі. Сярод іх — паэтычныя радкі Адама Міцкевіча, Чэслава Мілаша, Юліяна Тувіма, Яна Бжэхвы, Хэлены Бэхлеровай, Яна Твардоўскага, Эдварда Стахуры і іншых польскіх творцаў.
Юныя дэкламатары падарылі гледачам часцінку свайго сэрца і душы, прадэманстравалі свой выканальніцкі талент і літаратурныя здольнасці. Усе ўдзельнікі паказалі добрае веданне польскай мовы і разуменне паэтычнага твора.
Натхнёна расказвалі вершы самыя маленькія ўдзельнікі конкурсу — Маргарыта Сарасек (ІІІ месца), Дамініка Шыдлоўская (ІІ месца), Паліна Пашкоўская (ІІ месца) і Вікторыя Лазарчык (І месца).
Данеслі меладычнасць польскай мовы і яе эмацыянальнасць Аляксандра Карнільчык (ІІІ месца), Дар’я Харэвіч (ІІ месца), Андрэй Хаткевіч (ІІ месца), Аліна Людкоўская (ІІ месца), Ян Віткоўскі (І месца) і Матвей Пятроў (І месца).
З вуснаў старэйшых чытачоў Алены Лабачэўскай (ІІІ месца), Вікторыі Дакурна (ІІІ месца), Дзмітрыя Аскіркі (ІІ месца), Марыі Ярафеевай (ІІ месца) і Сабіны Баяровіч (І месца) даносілася шмат кранальнай лірычнай і філасофскай паэзіі.
Выступленне юных чытачоў ацэньвала журы — настаўнікі, якія стараюцца прывіць любоў да польскай паэзіі, — Людміла Францаўна Багдановіч, Аліна Уладзіміраўна Івашка, Алена Іосіфаўна Лазарчык і Аліна Казіміраўна Мікліс. Яны падзякавалі школьнікам і адзначылі якасць падрыхтоўкі, выбраны рэпертуар, эмацыянальнасць і выразнасць чытання.
Час праляцеў незаўважна хутка. Выступоўцы змянялі адзін аднаго. Але адно засталося нязменным — радасць ад прыгажосці слова, мілагучнасці гукаў і голасу, творчая ўзнёсласць. Пераможцы — Вікторыя Лазарчык (гімназія №1), Ян Віткоўскі (СШ №1) і Сабіна Баяровіч (Цудзенішскі ВПК) — адправяцца на абласны конкурс чытачоў польскай паэзіі імя Адама Міцкевіча, які хутка адбудзецца ў Гродне.
…Цёплы вечар скончыўся, усе разышліся, выключылі святло ў актавай зале. Праз маленькую шчыліну ў калідор прасочваўся невялікі прамень святла. Здавалася, сюды завітаў статны і сур’ёзны Адам Міцкевіч, каб пачытаць свае вершы нашчадкам і падзякаваць за тое, што яны захоўваюць багатую спадчыну беларускага і польскага народаў.
Кацярына РУДЗІК.
Фота Святланы МУЦЯНСКАЙ.