Нядаўна ў сярэдняй школе №3 прайшоў раённы конкурс на лепшую пярвічную арганізацыю грамадскага аб’яднання БРСМ “Школьны марафон”. Школьнікі з Ашмянаў, Барунаў, Граўжышкаў, Дакурнішкаў, Жупранаў, Кальчунаў, Мураванай Ашмянкі, Навасёлкаў і Цудзенішкаў расказалі аб пярвічных арганізацыях БРСМ сваёй установы адукацыі.
Школьнікі прадставілі візітоўку пярвічнай арганізацыі “Давайце пазнаёмімся!”, у якой расказалі аб дзейнасці сваёй “пярвічкі”, аб моладзевых праектах, у якіх прымалі ўдзел. Удзельнікі кожнай каманды прадэманстравалі свой талент, творчасць, вакальныя і харэаграфічныя здольнасці, а таксама пачуццё гумару.
Творчыя старонкі дзейнасці сваёй арганізацыі прагарталі вучні сярэдніх школ №1, №2, гімназіі №1, Навасёлкаўскага і Дакурнішскага ВПК. Летапіс жыцця ў выглядзе фотаздымкаў і відэаролікаў прадэманстравалі вучні школы-інтэрната, выхаванцы Граўжышкоўскага ВПК, а таксама СШ №3. Дарэчы, фільм вучняў СШ №3 аб маленькіх цімураўцах нікога не пакінуў раўнадушным. Пярвічную арганізацыю СШ №2 прадставіла каманда КВН “Крутыя перцы”. Мураванаашмянкоўцы расказалі аб акцыях і праектах, у якіх удзельнічалі. Творчую інсцэніроўку аб зараджэнні пярвічнай арганізацыі БРСМ з прыходам маладога спецыяліста Вікторыі Барташэвіч прапанавалі гледачам вучні Барунскага ВПК.
Актыўнасць, крэатыўнасць, дасягненні і моладзевыя праекты падрастаючых лідараў высока ацанілі журы і гледачы. Лепшай стала каманда СШ №1, другое месца журы аддало СШ №3, трэцяе – Барунскаму ВПК. Усе ўдзельнікі атрымалі дыпломы, а пераможцы -памятныя падарункі і кубак, які ў наступным годзе пяройдзе да новых пераможцаў.
Кацяына РУДЗІК.
Фота Святланы МУЦЯНСКАЙ.