У раённым цэнтры культуры прайшло мерапрыемства для ўсіх, хто любіць танцаваць і цікавіцца гісторыяй. На забаўляльна-пазнавальную праграму “Культурная спадчына – повязь часоў” запрасілі ашмянцаў удзельнікі тэатра гістарычнага танца Soleil і дуэта “Дзівабор” з Мінска.
Пасля кароткага аповеду пра культуру і побыт Заходняй Еўропы XIV стагоддзя госці прадэманстравалі паказальныя танцы La Rotta і Saltarello, а таксама сярэднявечны фарс “Балея”. Фарс – камедыйны жанр, таму радасці і смеху было досыць багата.
Гледачы не былі пасіўнымі назіральнікамі. Ім была прапанавана гульня “Кармленне ліса”, а таксама танцавальны майстар-клас. Юныя ашмянцы навучыліся выконваць старадаўнія беларускія танцы “Маразуля” і “Анёл”, старафранцузскія – Ai vis lo lop (“Я бачыў ваўка”) і “Бранль прачак”, румынскі – Drumul Draculi, а таксама “Кастарват”, вядомы ў кельцкіх народаў: ірландцаў, брэтонцаў і шатландцаў.
Асаблівасць мерапрыемства ў тым, што ўсе прапанаваныя для развучвання танцы – так званыя сацыяльныя – нескладаныя па кампазіцыі, рухавыя і разлічаныя не на знешні эфект, а на клопат пра суседа па карагодзе. Усе наведвальнікі мелі выдатную магчымасць атрымаць добры настрой і карысныя веды. З мінскімі гасцямі ашмянцы яшчэ змогуць сустрэцца сёлета на фестывалі “Гальшанскі замак-2016”.
Дзмітрый РАДКЕВІЧ.
Фота Святланы МУЦЯНСКАЙ.