Побач з вялікім святам у Жупранах, прымеркаваным да юбілею Францішка Багушэвіча, у раёне прайшло яшчэ адно мерапрыемства – канферэнцыя “ Багушэвіч – гонар і годнасць беларусаў”. Як і папярэдняе, яно было арганізавана работнікамі культуры раёна і сабрала вакол сябе шмат неабыякавых і творчых людзей: краязнаўцаў, настаўнікаў, вучняў, бібліятэчных і музейных работнікаў, мясцовых паэтаў.
Канферэнцыя адбылася ў раённым краязнаўчым музеі імя Багушэвіча. Пачалася яна адкрыццём выставы “Шануем памяць аб табе, наш славуты зямляк”, з экспанатамі якой пазнаёміла навуковы супрацоўнік музея Вераніка Рэмізевіч. Затым гаспадыня і вядучая мерапрыемства Жанна Іванова прадставіла ўдзельнікаў канферэнцыі. Рады ўсе былі сустрэчы з шаноўным госцем, даследчыкам жыцця і творчасці паэта, аўтарам шматлікіх кніг Уладзімірам Содалем, а таксама калекцыянерам, паэтам і даследчыкам ашмянскай шляхты, ураджэнцам Ашмян Васілём Юршам. З прывітальным словам да ўдзельнікаў канферэнцыі звярнуліся намеснік старшыні райвыканкама Аляксандр Саванец і начальнік аддзела культуры Галіна Балінская.
Цікавыя і змястоўныя работы — даследаванні жыцця і творчасці Багушэвіча падрыхтавалі вучні школ раёна. Па жыццёвых сцежках паэта падарожнічалі ўдзельнікі і госці свята разам з Насцяй Бенедзісюк, вучаніцай СШ №1. Аб творчасці паэткі з Міхайлоўшчыны Валянціны Гіруць-Русакевіч падрыхтавала паведамленне Юля Балейка з СШ №3. Дзяўчынка не проста расказала аб сваёй зямлячцы, але і правяла паралель паміж яе творчым шляхам і Францішка Багушэвіча, які, дарэчы, з’яўляецца далёкім сваяком паэткі. Вялікую даследчыцкую работу правялі разам са сваімі настаўнікамі Ганна Багдановіч, вучаніца Гродзіеўскай БШ (“Паўстанне ў лёсе Багушэвіча”), Надзея Станчык, вучаніца Клявіцкай БШ (“Народны адвакат”), Анастасія Дзятловіч, вучаніца Граўжышкоўскага НПК (“Паэтычная творчасць”), Марта Буйноўская, вучаніца Анжадаўскай БШ (“На радзіме Багушэвіча”), Вольга Аўсюкевіч і Юля Клушэўская, вучаніцы Кальчунскай СШ (“Не пакідайце ж мовы нашай беларускай, каб не ўмёрлі…”).
З навуковай работай “Жыць, служыць і тварыць для народа” выступіла супрацоўнік раённага краязнаўчага музея Ірына Бусловіч. Бібліятэкар цэнтральнай бібліятэкі Вольга Швец правяла агляд літаратуры па творчасці і жыцці Багушэвіча, пазнаёміўшы як з кнігамі пра паэта, так і артыкуламі з перыядычных выданняў, якія можна праглядзець у нашай бібліятэцы. Цікавыя звесткі пра радавод Багушэвіча сабраў наш зямляк Васіль Юрша. Шмат якія з іх удзельнікі канферэнцыі пачулі ўпершыню. З новай сваёй кнігай пра паэта — “Блаславёныя Кушляны” прыехаў у госці Уладзімір Содаль. Ён быў вельмі ўзрушаны цёплай сустрэчай і гасціннасцю арганізатараў свята. Даследчык выказаў падзяку усім, хто прымаў удзел у падрыхтоўцы мерапрыемства, хто беражліва і з павагай ставіцца да нашай літаратурнай спадчыны. Уладзімір Ільіч выступіў з даследаваннем па тэме “Жан Беранжэ ў Кушлянах”.
На канферэнцыі было прачытана нямала вершаў Багушэвіча, а таксама прысвячэнняў у гонар паэта. Пётр Шакола шмат паэтычных радкоў склаў аб нашым слаўным земляку. Узнёсла і трапна гучалі “Яго дудка”, “Іду к Багушэвічу”, “Францішак Багушэвіч і Жупраны” падчас мерапрыемства. Свой верш паэту прысвяціла і вучаніца Клявіцкай школы Надзея Станчык.
Віртуальную экскурсію па школьным музеі імя Багушэвіча правяла настаўніца беларускай мовы, кіраўнік музея Жупранскай СШ Галіна Лукша.