Два новыя школьныя аўтобусы атрымала ўпраўленне адукацыі Ашмянскага райвыканкама да новага навучальнага года.
Як паведамілі ва ўпраўленні адукацыі, на набыццё адзінак транспарту выдаткавана звыш 175 тысяч рублёў з раённага бюджэту. Новенькія ПАЗы 32-053 на 23 месцы кожны ўжо папоўнілі аўтапарк. Па словах інжынера па транспарце Івана Барткевіча, зараз у ім налічваецца дванаццаць аўтобусаў, якія з першага верасня будуць задзейнічаны на падвозе дзяцей у розныя ўстановы адукацыі нашага раёна.
Акрамя таго, падчас падрыхтоўкі да новага навучальнага года школьныя аўтобусы былі пафарбаваны і адрамантаваны. Своеасаблівы ўнёсак у гэту важную справу зрабіла вучаніца сярэдняй школы №2 г.Ашмяны. «Якім чынам?» — здзівіцеся вы. Не хвалюйцеся, удзелу ў рамонтных работах дзяўчынка, зразумела, не прымала. Яшчэ ў траўні яна паўдзельнічала ў конкурсе «Вясёлая паездка з сябрамі на школьным аўтобусе», які абвясціла ТАА «Русаўтапром». Па звестках арганізатараў, каля 150 малюнкаў даслалі дзеці з розных куткоў Беларусі.
Вучаніца 5 класа СШ №2 Ксенія Хіневіч накіравала ў адрас арганізатараў ажно дзве работы: на адным малюнку яна адлюстравала паездку з паветранымі шарамі на дзень нараджэння, а на другім — займальнае падарожжа па Беларусі.
— Аказваецца, у нас ёсць вельмі цікавыя мясціны, не горшыя, чым Дзіснэйлэнд, — адкрыла для сябе Ксенія, калі вырашыла ўвасобіць на паперы сваю задумку — адлюстраваць своеасаблівую карту падарожніка. На ёй з’явіліся перавернуты дом у Полацку, парк-музей «Сула» каля Мінска, сафары на паравозе і многае іншае.
Па выніках творчага спаборніцтва дзяўчынка заняла першае месца. Пераможцу чакала не толькі асабістая ўзнагарода — смарт-гадзіннік, — але і заахвочванне для школы і ўпраўлення адукацыі. Так, дзякуючы таленавітай вучаніцы СШ №2 атрымала стол для малявання пяском і ноўтбук, а упраўленне адукацыі — сертыфікат на 450 рублёў для правядзення рамонту школьных аўтобусаў.
— Падарункі для школы прыйшліся дарэчы, — расказвае Ксенія. — Мая мама працуе педагогам-псіхолагам і даўно марыла, каб у кабінеце з’явіўся такі стол. Вельмі рада, што яе мара здзейснілася. А яшчэ спадзяюся, што падчас адпачынку бацькоў у нас атрымаецца пабываць хаця б у некалькіх месцах з тых, што я намалявала. Адчуваю, што будзе здорава!
Людміла РЫБІК.
Фота Святланы МУЦЯНСКАЙ.