Напярэдадні Дня народнага адзінства ў Іўі прайшла навукова-практычная канферэнцыя «Іўеўскі раён у кантэксце гісторыі краіны», а таксама прэс-тур для журналістаў суседніх раёнаў, у якім прыняў удзел і наш карэспандэнт.
У праграму мерапрыемства ўваходзіла наведванне адзінага ў сваім родзе ў нашай краіне музея нацыянальных культур, экскурсія па горадзе і непасрэдна сама канферэнцыя.
Брэндам Іўеўскага раёна, як зрэшты і нашага, можна смела назваць мірнае суіснаванне людзей розных нацыянальнасцей і веравызнання на працягу многіх стагоддзяў. Добрасуседскія адносіны паміж рознымі канфесіямі — гэта тое, чым можна ганарыцца і што неабходна захоўваць у першую чаргу.
У Іўеўскім музеі яго дырэктар Кацярына Маскалевіч расказала, чым іх установа вылучаецца сярод падобных і чым здзіўляе сваіх наведвальнікаў. Тут, акрамя традыцыйнай экскурсіі, у кожнай зале для гасцей праводзіліся незвычайныя прэзентацыі, якія дапамагалі глыбей акунуцца ў гісторыю мястэчка. Адна з залаў музея прысвечана цяжкаму лёсу беларускага народа ў гады Вялікай Айчыннай вайны, у прыватнасці, генацыду насельніцтва Іўеўшчыны, якое пацярпела ад зверстваў акупантаў.
Знаёмства з раённым цэнтрам для журналістаў працягнулася ў знакавым месцы – каля манумента чатырох канфесій, – якое напярэдадні Дня народнага адзінства набывае асаблівы сэнс. Кожная з чатырох стэлаў паказвае кірунак да храма адпаведнай рэлігіі. На каталіцкай частцы манумента размешчана грэчаская анаграма Хрыста, выява святога Яна Паўла ІІ і яго словы «Адкрыйце дзверы Хрысту»; на праваслаўнай — аблічча Іісуса, пакроў Багародзіцы і цытата з Евангелля «Я ёсць шлях, і ісціна, і жыццё». На іудзейскай — менора і прывітанне «Мір вам», а на ісламскай — паўмесяц і Каран.
Пра Іўе, як пра мадэль ідэальнага прыязнага свету, падчас выступлення на канферэнцыі не раз узгадваў і старшыня Іўеўскага райвыканкама Ігар Генец. Гэтую думку неаднаразова выказвалі і іншыя спікеры мерапрыемства, якія напомнілі, як на франтах Вялікай Айчыннай вайны за мірнае неба змагаліся не толькі хрысціяне, але і мусульмане, і іудзеі Іўеўшчыны, як беражліва захоўваюць тут памяць аб гераічным мінулым продкаў.
— Дзень народнага адзінства павінен прадэманстраваць маладому пакаленню значнасць гістарычнага мінулага, глыбінны сэнс якога заключаецца не ў наборы гістарычных звестак, а ў значэнні, якое ім надаецца, — адзначыў Ігар Генец. — Для таго, каб будаваць будучыню, неабходна ведаць мінулае.
Пра Вялікую Айчынную вайну ў лёсах жыхароў раёна расказаў старшыня раённага савета ветэранаў Іван Жыдэль, які заклікаў захоўваць памяць аб гераічным мінулым нашых продкаў і расказаў, як па крупінках аднаўляецца гісторыя кожнай нацыі раёна.
Антон МАЛЬШЭЎСКІ.