Шчодры сёлетні чэрвень на цёплае сонечнае надвор’е. Бадай, толькі мора не хапае для поўнага адчування замежнага курорта. Праўда, для малечы, якая стамілася пасля працяглага навучальнага года, куды важней добрая кампанія і насычаная праграма. Дадайце да гэтага сбалансаванае харчаванне і параўнальна невялікі кошт пуцёўкі і зразумееце, чаму такім попытам карыстаюцца ў хлопчыкаў і дзяўчынак, а таксама іх бацькоў дзіцячыя летнікі.
Крэйванцаўскі вучэбна-педагагічны комплекс традыцыйна прыняў выхаванцаў летніка з дзённым знаходжаннем. Адклаўшы падручнікі і сшыткі, з першых дзён лета дзеці з задавальненнем адправіліся ў цікавую вандроўку. “З усмешкай па родным краі” – так называецца праект, які прапанавалі хлопчыкам і дзяўчынкам у школе. Дырэктар лагера Алена Даўжук, выхавацелі Антаніна Лукша, Людміла Зарэцкая, Валерый Чарток, Марта Якубель запрасілі малечаў у незабыўнае летняе падарожжа.
— За змену мы павінны прайсці па васямнаццаці сцяжынках, якія дапамогуць нам лепш пазнаёміцца з родным краем і яго гісторыяй, — адзначаюць дзеці. – Разам з настаўнікамі мы ўжо наведалі некалькі цікавых мясцін.
З непадробным захапленнем і дзіцячай непасрэднасцю расказваюць выхаванцы пра сустрэчу са сваімі добрымі сябрамі-пагранічнікамі, з якімі школа даўно супрацоўнічае. Экскурсіі ў ваенную часць 2044 г. Смаргонь і на пагранічны пост “Крэйванцы” пакінулі пасля сябе столькі ўражанняў! Спецыяльнае абсталяванне для затрымання парушальнікаў граніцы, біноклі, вінтоўкі, сістэма відэаназірання зацікавілі не толькі хлопчыкаў, але і дзяўчынак. А яшчэ сэрцы юных гасцей пакарылі Фларыда, Патрык, Уміда, Уна – чатырохногія памочнікі пагранічнікаў. Ахоўнікі мяжы разам з кінолагамі прадэманстравалі, што сваю справу добра ведаюць.
Патрыятычны напрамак змены працягнуў шэраг іншых мерапрыемстваў. Сярод іх – музейны занятак, віктарына “Гарады-героі”, аперацыя па навядзенні парадку ля помніка загінуўшым землякам, конкурс малюнкаў, знаёмства з выбітнымі землякамі, у ліку якіх і Франц Клінцэвіч. У рамках акцыі “Беларусь помніць”, прысвечанай вызваленню Беларусі ад нямецка-фашысцкіх захопнікаў, прайшоў таксама відэажурнал “Гісторыя стварэння ваеннай песні”. Бібліятэкар мясцовай бібліятэкі Валянціна Дзядзічкіна запрасіла дзяцей на ўрок мужнасці “У баях за родны край”.
Асаблівыя ўспаміны пакінулі пасля сябе вандроўкі: пешаходная — да сядзібы ў вёсцы Вельбутова і аўтобусная – у палацава-паркавы ансамбль Агінскіх у Залессі, дзе юным наведвальнікам прапанавалі гульню-квэст і тэатралізаванае прадстаўленне.
Актыўны адпачынак у выглядзе вандровак і спаборніцтваў змяняюць заняткі ў гуртку “Лепім з цеста” з Крысцінай Міцкевіч і трэнінгі супраць шкодных звычак, па бяспецы паводзін, якія праводзіць педагог сацыяльны Юлія Укружская.
Яркія пазлы, а іх дорыць кожны дзень, гарманічна ўпісваюцца ў агульны малюнак змены, дзе ёсць месца гульням і эстафетам, падарожжам і знаёмству з нязведаным, сяброўству і шчырым усмешкам, памяці аб подзвігу герояў і гонару за краіну, якая ў сімвалічны Год малой радзімы прымае II Еўрапейскія гульні, адзначае столькі юбілейных дат.
Людміла ВЕРАС.