Цяжка сказаць, што было на душы ў педагогаў, якія завіталі на традыцыйную на Ашмяншчыне сустрэчу ветэранаў педагагічнай працы. Хтосьці ўспамінаў сваю маладосць, свой першы ўрок і са шкадаваннем думаў аб тым, што гэта шчымлівае імгненне ніколі не паўторыцца ў іх жыцці. Для кагосьці такія святы — магчымасць сустрэцца са сваімі калегамі, распытаць аб навінах і здароўі, аб дзецях і ўнуках, аб тых маленькіх хвілінах радасці, якія напаўняюць жыццё. А хтосьці падчас свята з гонарам адзначыў, што старэйшае пакаленне настаўнікаў можа быць цвёрда ўпэўнена ў тым, што сённяшнія педагогі Ашмянскага раёна іх не падвядуць. Яны сталі дастойнай зменай і надзейнымі прадаўжальнікамі багатых педагагічных традыцый у гэтым краі. Гэта падкрэсліла ў сваім выступленні і начальнік аддзела адукацыі Наталля Кучынская. На працягу апошніх год аддзел адукацыі раёна ўваходзіць у тройку лепшых у вобласці. Па выніках работы за 2010 год сістэма адукацыі раёна заняла першае месца сярод аддзелаў сваёй групы ў абласным конкурсе на лепшую арганізацыю работы. Чатыры ўстановы адукацыі сталі лаўрэатамі конкурсу “Брэнд сістэмы адукацыі вобласці -2010”: сярэдняя школа №1, школа-інтэрнат, дашкольны цэнтр развіцця дзіцяці горада і яслі-сад аграгарадка Гальшаны. Не можа не радаваць у гэтым годзе і такі факт, як стопрацэнтнае паступленне медалістаў у вышэйшыя навучальныя ўстановы. У цэлым у вну паступіла сёлета 66,2 працэнта выпускнікоў раёна. Прыемна зазначыць, што 33 выпускнікі абралі для сябе педагагічныя спецыяльнасці. Хочацца спадзявацца, што праз некалькі год яны “ўльюцца” ў дружную педагагічную сям’ю ашмянскіх настаўнікаў. Гэтак як і 22 маладыя спецыялісты, якія прыйшлі ва ўстановы адукацыі ў гэтым годзе.
Сёлета эстафету свята пераняла сярэдняя школа №1. У яе сценах такія сустрэчы праводзяцца ў трэці раз. Сама ж традыцыя налічвае больш дзесяці год. Калісьці яе прапанаваў старшыня райкама прафсаюза работнікаў адукацыі і навукі Мікалай Кунцэвіч. Аддзел адукацыі гэтую ідэю падтрымаў. І яна стала адным з самых цёплых і запамінальных мерапрыемстваў, дзякуючы якому раз у два гады збіраецца пад адно крыло дружная педагагічная сям’я раёна.
Сёлета больш двухсот настаўнікаў і выхавацеляў, работнікаў аддзела адукацыі ( не паварочваецца язык назваць іх былымі) прыйшлі ў СШ №1, каб разам адзначыць сваё прафесійнае свята – Дзень настаўніка. Госці былі прыемна ўражаны тэрыторыяй гэтай установы адукацыі. У Нават і цяпер, у кастрычніку, яна працягвае радаваць вока мяккім шапаценнем позніх кветак, супакойвае душу нетаропкай мелодыяй празрыстых ручайкоў, што разбягаюцца па тэрыторыі ад фантана-крынічкі.
Прыемным сюрпрызам для ўдзельнікаў свята стала канцэртная праграма, якую падрыхтавалі вучні школы, удзельнікі ўзорных калектываў ”Званочкі”, “Палёт” і “Эфект”. Свае віншаванні гасцям і падзяку за нястомную працу на педагагічнай ніве Ашмяншчыны выказалі начальнік аддзела адукацыі Наталля Кучынская і старшыня райкама прафсаюза работнікаў адукацыі і навукі Мікалай Кунцэвіч.
Свята прадоўжылася ў прасторным холе школы, дзе ва ўтульнай хатняй абстаноўцы за багата накрытымі сталамі пад мелодыі мастацкага калектыву Мураванаашмянкоўскага сельскага Дома культуры ўсе разам успаміналі працоўную дзейнасць, сваіх вучняў і калегаў. Дырэктар СШ №1 Міхаіл Гружэўскі з цеплынёй расказаў аб людзях, якія былі прыкладам і памочнікамі ў станаўленні яго як кіраўніка. Гэта ў першую чаргу Уладзімір Пятроўскі, Андрэй Захаркевіч, Дзмітрый Саламонаў і Валянцін Ган. Вялікім гонарам было працаваць у калектыве СШ №2 разам з заслужанымі настаўнікамі БССР Зінаідай Арцем’евай, Ганнай Бабарыкінай, Галінай Шумскай, Віктарам Саковічам. Заўсёды адчуваў ён падтрымку свайго намесніка па вучэбна-выхаваўчай рабоце, сапраўднага прафесіянала Міхаіла Луні.
Вельмі рады быў запрашэнню на святочную сустрэчу былы загадчык аддзела адукацыі Рычард Вярцінскі, які на працягу дзесяці год працаваў затым у Міністэрстве адукацыі Рэспублікі Беларусь. Наведваючы ўстановы адукацыі другіх абласцей, ён увесь час параўноўваў іх са сваімі, ашмянскімі, якія заўсёды былі і будуць, упэўнены Рычард Эдмундавіч, установамі высокай культуры і ўзорнага парадку.
Шмат цёплых слоў у адрас калег і арганізатараў свята выказалі Крысціна Яблонская, Жанна Загорская, Галіна Шумская, Людміла Міхневіч, Алена Лісава, Алег Дзедзюль, Уладзімір Карасёў, Ніна Ляшок…
Амаль у кожнай школе раёна працуюць і працавалі сямейныя пары. Адна з іх – Іван Мацвеевіч і Жанна Міхайлаўна Кірышчэнкі з Мураванай Ашмянкі – хутка адзначыць залатое вяселле. Яны падзяліліся на свяце сакрэтамі сямейнага даўгалецця. Нягледзячы на ўзрост, іх вочы выпраменьваюць дабрыню і святло, якія дапамагаюць пераадольваць цяжкасці і ісці па жыцці адкрыта, з павагай і любоўю адзін да аднаго і да людзей.
Святочная імпрэза прайшла на адным дыханні. Яна была па-сапраўднаму душэўнай і цёплай. Гэта было бачна і па гасцях, якія нягледзячы ні на што, адчувалі сябе маладымі і энергічнымі. Яны пакінулі дома ўсе клопаты і турботы, каб у чарговы раз вярнуцца, няхай сабе і ва ўспамінах, да лепшых гадоў свайго жыцця, жыцця, якое цалкам было аддадзена самай высакароднай прафесіі на Зямлі.
Аліна САНЮК.
Фота аўтара.