Ва ўстановах адукацыі раёна поўным ходам ідзе падрыхтоўка да навагодніх свят. Яркае ўбранне набываюць школьныя фасады, рознакаляровымі агеньчыкамі мігцяць вокны кабінетаў. Лясныя прыгажуні перабіраюцца ў класы і холы. Фантазія настаўнікаў і дзяцей праяўляецца ў вытанчаных сняжынках-выцінанках, што запаланілі аконныя праёмы, ёлачных цацках і гірляндах, карнавальных касцюмах і, канешне, у падарунках. Без іх не абыходзіцца ні адно свята, а тым больш – Новы год.
Адметна тое, што ў творчых казачных майстэрнях працуюць дзеці рознага ўзросту. Валанцёрскія атрады, створаныя ва ўсіх школах раёна і цэнтры творчасці дзяцей і моладзі, рыхтуюць падарункі для людзей, якія па пэўных прычынах не маюць магчымасці ў поўнай меры адчуць асалоду ад свята. Акцыя “На крылах дабра і міласэрнасці” распачнецца 20 снежня. Школьнікі завітаюць у госці да адзінокіх пажылых людзей, ветэранаў Вялікай Айчыннай вайны і працы, людзей з абмежаванымі магчымасцямі, каб падарыць ім часцінку сваёй ўвагі і цяпла і павіншаваць з надыходзячымі Калядамі і Новым годам.
Аліна БЕЛІЦКАЯ.
Фота Святланы МУЦЯНСКАЙ.
На здымках: кіпіць работа ў творчых майстэрнях СШ №3 і цэнтра творчасці дзяцей і моладзі.