Традыцыйны восеньскі кірмаш прайшоў у Ашмянах 7 кастрычніка. Гараджан і гасцей горада чакалі багатыя гандлёвыя палаткі і машыны сельгасарганізацый раёна, прадпрыемстваў і фермерскіх гаспадарак, а таксама ўвішныя гаспадары, якія прывезлі на продаж лішкі вырашчанай на сваіх участках садавіны і гародніны, і нават выгадаваную жыўнасць.
За пакупкамі запрашалі не толькі гандляры, але і народны ансамбль цыганскай песні раённага цэнтра культуры “Джана Рома”, заслухаўшыся якім, людзі забываліся пра клопаты аб запасах на зіму.
Што набывалі ашмянцы на кірмашы? Многіх цікавіла бульба. Куплялі яе цэлымі мяхамі. Дэмакратычны кошт дазваляў гэта зрабіць без урону для свайго кашалька. У сярэднім прапаноўвалі “другі хлеб” па 30 капеек за кілаграм. Хутка разыходзілася капуста, морква, цыбуля, памідоры і буракі. Цікавіліся пакупнікі салодкім балгарскім перцам. Попытам карысталіся саджанцы пладовых дрэў і кустоў, а таксама рознай экзотыкі накшталт актынідыі, ягад годжы і буякоў. Гэты тавар, а таксама саджанцы агрэсту, ажыны без калючак, вінаграду латвійскай селекцыі, арэха грэцкага, журавін, шматлікіх гатункаў клубніц прапаноўвалі не толькі свае фермеры, але і гаспадары ажно з Копыля і Бабруйска.
Шмат было хрызантэмы – восеньскай кветкі, якая не перастае нас радаваць яркімі колерамі ў пахмурныя шэрыя дні.
Вялікім попытам карысталася ў ашмянцаў збожжа. Да машын сельскіх гаспадарак выстройвалася значная чарга. Напрыклад, КСУП “Крэйванцы” прапаноўваў ячмень па 25 капеек, а пшаніцу — па 30 капеек за кілаграм. Разышлося зерне ў імгненне вока. Цікавіліся пакупнікі і яблыкамі КСУП “Ашмянскі світанак”. За рубель можна было набыць гатункі “імант”, “беларускі салодкі” і “заслаўскі”. Прыватныя асобы садавіну прадавалі даражэй: некаторыя гатункі яблыкаў гандляры не хацелі аддаваць танней, чым за 2 рублі. Столькі каштавалі і грушы.
Шмат цікаўных збіралася ля трусоў французскай пароды “рэкс”. Гадаванцаў Ігара Філатава з Ліды хацелася не толькі пагладзіць, але і купіць. Шыкоўная труска Жозэфіна дазваляла нават зрабіць з ёй здымак. Ігар Мікалаевіч па спецыяльнасці оптык, таму нядзіўна, што ён захапіўся яшчэ адной цікавай справай – вырабам упрыгожанняў са шкла ў тэхніцы “лэмпворк” (стварэнне бусін шляхам плаўлення шкла ў агні газавай гарэлкі). Шкляны цуд, які прывёз лідскі майстар, немагчыма было не купіць, хаця, прызнацца, вырабы каштуюць немалых грошай. Вырабы народных майстроў прапаноўваў і ашмянскі раённы цэнтр культуры.
Ніхто не пакідаў кірмашу з пустымі рукамі. ААТ “Белкава” запрашала падсілкавацца кавай. Побач філіял спажывецкага таварыства заклікаў паласавацца кандытарскімі вырабамі, а таксама набыць мясныя паўфабрыкаты. На кірмашы можна было купіць жывую рыбу, прывезеную з Солаў, грыбы, квашаную капусту. Гандлявалі ў гэты дзень і цёплымі курткамі, вязанымі шапкамі і шалікамі, рукавіцамі і шкарпэткамі. Было шмат абутку: ад гумовых ботаў да зімовых чаравікаў.
Наступны кірмаш пройдзе ў Ашмянах у нядзелю, 22 кастрычніка. Хто не паспеў закупіцца на зіму, зможа зрабіць гэта напрыканцы кастрычніка.
Аліна САНЮК.
Фота Святланы МУЦЯНСКАЙ.
Відэа Аляксандра НАУМЧЫКА