На Ашмяншчыне скончыўся тыдзень культуры “Наша культурная спадчына”. Творчыя сустрэчы, прысвечаныя вядомым дзеячам, таленавітым і апантаным землякам, паэтам, прайшлі амаль у кожным куточку нашага раёна. Апошняе ўрачыстае мерапрыемства адбылося ў раённым цэнтры культуры і было прысвечана людзям, якія заўсёды ствараюць свята – работнікам культуры.
У нашым раёне стала добрай традыцыяй віншаваць тых, хто сваёй творчасцю, любоўю да абранай прафесіі запальвае і сагравае сэрцы іншых. Хто стварае святочны настрой, адкрывае кожнаму чалавеку таямнічую дзверцу ў свет прыгожага… Шмат слоў у гэты дзень было сказана аб натхнёных, творчых, таленавітых, ініцыятыўных аматарах і прафесіяналах сваёй справы.
На ўрачыстым мерапрыемстве прысутнічалі кіраўнікі і работнікі ўстаноў культуры, ветэраны і маладыя спецыялісты. Шмат шчырых слоў, цёплых віншаванняў у гэты дзень гучала ад намесніка старшыні райвыканкама Галіны Люткоўскай, начальніка аддзела ідэалагічнай работы, культуры і па справах моладзі Людмілы Каханоўскай, яе намесніка Валянціны Александровіч, старшыні раённай прафсаюзнай арганізацыі работнікаў культуры, інфармацыі, спорту і турызму Вольгі Тарашкевіч.
Напярэдадні Дня работнікаў культуры добрыя навіны прыйшлі ў храм творчасці –калектыў Гальшанскай школы мастацтваў на чале з Наталляй Трот быў узнагароджаны ганаровай граматай Гродзенскага абласнога Савета дэпутатаў, ганаровую грамату Беларускага саюза прафсаюзаў работнікаў культуры, інфармацыі, спорту і турызму атрымала старшыня прафсаюзнай арганізацыі, намеснік дырэктара раённай бібліятэкі Вольга Тарашкевіч. Ганаровай граматай галоўнага ўпраўлення ідэалагічнай работы, культуры і па справах моладзі Гродзенскага аблвыканкама ўзнагароджаны навуковы супрацоўнік краязнаўчага музея імя Ф. Багушэвіча Ірына Бусловіч і загадчык Гальшанскай сельскай бібліятэкі Алёна Юневіч.
Са словамі віншавання да прысутных звярнулася Галіна Станіславаўна Люткоўская. Яна выказала ўпэўненасць у тым, што штодзённая праца культработнікаў і далей будзе радаваць гледачоў і прыносіць задавальненне ад самых смелых і цікавых ідэй і праектаў, у тым ліку і міжнародных. Словы спецыяліста падцвердзіла міжнародная ўзнагарода – дыплом за актыўны ўдзел у праграме “Месяц беларускай культуры ў Мінск-Мазавецкім” атрымаў народны ансамбль песні і танца “Крыніцы” (кіраўнік Вольга Чаплінская). За творчыя дасягненні ганаровай граматай Ашмянскага райвыканкама быў узнагароджаны народны ансамбль народнай песні “Жытніца” (аддзел культуры і вольнага часу аг. Кракоўка).
Вядучыя свята Марта Ланеўская і Канстанцін Яраш павіншавалі са святам ветэранаў, якія калісьці аддалі шмат гадоў працы ва ўстановах раёна, падарылі бясцэнны вопыт новым пакаленням музыкантаў, настаўнікаў і бібліятэкараў. Завітала на свята і былы начальнік аддзела ідэалагічнай работы, культуры і па справах моладзі Галіна Балінская, культработнікі — Уладзімір Карасёў і Крысціна Міцкевіч, бібліятэкары — Яніна Каспяровіч і Валянціна Лабуніна, настаўнікі — Мікалай Розенберг і Тамара Грыневіч.
Віншаванні чаргаваліся з канцэртнымі нумарамі і ўзнагароджаннем лепшых работнікаў сферы і кіраўнікоў творчых калектываў Ашмяншчыны. Традыцыйна на сцэну выходзілі бібліятэкары, выкладчыкі дзіцячых школ мастацтваў, загадчыкі сельскіх ўстаноў культуры, спецыялісты розных напрамкаў творчай дзейнасці, работнікі музейнай справы, тэхнічнага забеспячэння.
Падчас свайго выступлення Людміла Каханоўская расказала пра творчыя здабыткі работнікаў культуры, спыніла ўвагу на значных падзеях, удзеле ў рэспубліканскіх і міжнародных праектах. Людміла Антонаўна падзякавала ўсім работнікам культуры Ашмянскага раёна за пастаянны творчы пошук, таленты, адданасць прафесіі, за ўдзел у брэндавых мерапрыемствах і святах, якія, безумоўна, сталі ці ў хуткім часе стануць візітоўкай Ашмяншчыны.
Людміла Каханоўская адзначыла важную ролю прафсаюза ў стымуляванні працы і абароне правоў работнікаў культуры раёна. Падарункамі ад прафсаюзнай арганізацыі работнікаў культуры ўзнагародзілі тых, хто некалькі дзясяткаў гадоў сваёй працоўнай біяграфіі прысвяціў творчасці.
Цёпла прынялі ў свой калектыў і маладых спецыялістаў, якія ў гэтым годзе прыступілі да працы на Ашмяншчыне. Маладыя спецыялісты не засталіся ў баку ад святочных падзей і прадэманстравалі свае творчыя таленты на сцэне.
Тэатралізаваныя пастаноўкі, выступленні музыкантаў і творчых калектываў не пакінулі абыякавымі тых, хто сабраўся ў зале. Напрыканцы свята малады склад работнікаў культуры выканаў прафесійны гімн, пасля чаго гасцей чакала выступленне музыкантаў з Ліды.
Кацярына РУДЗІК.
Фота Святланы МУЦЯНСКАЙ.