Жніво ўступіла ў сілу. Ва ўборачнай кампаніі ў нашай краіне ўдзельнічаюць тысячы працоўных рук, якія ўжо намалацілі 4 мільёны тон збожжа. У Гродзенскай вобласці намалочана больш за 550 тысяч тон збожжа пры захаванні найлепшай ураджайнасці па краіне – больш за 40 цэнтнераў з гектара. Аграрыі Ашмяншчыны таксама робяць свой унёсак у агульную справу. На 7 жніўня нашы аграрыі ўжо абмалацілі збожжа на 47 працэнтах плошчаў ад запланаваных 16 071 гектара. Усяго намалочана 20 660 тон пры ўраджайнасці 29,8 цэнтнера на круг. Зернесушыльныя комплексы раёна працуюць у штатным рэжыме кругласутачна.
У мінулую пятніцу былі ўзнагароджаны пераможцы раённага спаборніцтва сярод аграрыяў па выніках дзесяці дзён жніва за перыяд з 26 ліпеня па 5 жніўня.
З віншаваннямі на ніву прыехалі старшыня райвыканкама Міраслаў Сарасек і лідар прафсаюза работнікаў аграпрамысловага комплексу Раіса Турлай.
Першым пунктам стаў СВК “Гальшанскі”. Тут найлепшыя намалоты атрымалі механізатар Генадзь Скаржынскі з памочнікам Андрэем Давідовічам, якія працуюць на камбайне “Джон Дзір”. Іх вынік – 418,2 тоны збожжа.
На камбайне КЗС-1218 лепшых паказчыкаў дабіўся яшчэ адзін гальшанскі механізатар
Станіслаў Даніленка. Яму дапамагае Павел Акулевіч, навучэнец аграрна-тэхнічнага каледжа,
будучы трактарыст-машыніст. Навыкі работы ў полі яму спатрэбяцца і ў будучым. Іх ніва цяпер – ля вёскі Падгаі. Вынік за дзесяцідзёнку – 353 тоны.
У ліку лепшых ашмянскіх хлебаробаў і механізатар эксперыментальный базы “Баруны” Віктар Шчыгло, які на камбайне КЗС-10К убірае ячмень ля вёскі Гінеўцы. Руплівец намалаціў 278 тон, атрымаўшы лепшы вынік у сваёй катэгорыі.
Віншаванні прымаў таксама Мар’ян Янкоўскі, вадзіцель СВК “Граўжышкі”, які працуе на
грузавым аўтамабілі МАЗ. За дэкаду ён даставіў з поля 423 тоны. А апошнім быў узнагароджаны вадзіцель СВК “Ашмянскі Світанак” Часлаў Шукеловіч, які на аўтамашыне ГАЗ перавёз 386,9 тоны збожжа.
Пажаданні і віншаванні, каштоўныя падарункі і кветкі – толькі невялікая доля той удзячнасці, якой заслугоўваюць вяскоўцы.
Дзмітрый РАДКЕВІЧ.
Фота Аляксандра НАУМЧЫКА.